廿一歲的笑忘書 - 我不是我？

這廿年來做過的事，能令你無悔驕傲嗎？

每一次有人話我似老豆，我都會好想問佢: 究竟我邊度似。
有時，我可能會笑住咁話:
「妖！咁我去整容囉，整完咪唔似囉。」
呢句話…唔好當係'小朋友'講既戲話。
雖然我唔會有錢、亦唔會夠膽去整容，
但每一次話我似老豆，
每一次都好似o係我身上桶一刀，
好痛。



我喊唔係因為我發脾氣…
而係因為老豆加埋呢條村俾我既陰影廿一年都未散去…
仲記得1,2歲o個陣o係新民樓見到既情景，
仲記得幾歲o個陣半夜喊住要返元朗…
我以為自己返左元朗幾日之後返黎情緒會好返啲，
點知都係咁…
每晚訓著，我就好怕諗返起細個o個陣既我…
細個既我，就好似係一張俾人撕碎左既紙…
然後經過好多年好多年，
慢慢o係唔同地方 一張一張咁搵返，用膠紙痴返埋。
但係，呢張紙點痴都冇辦法好似以前既佢咁完整。
總會
有一部分俾風吹走左，
有一部分俾火燒左，
有一部分俾水浸濕左。
有一部分俾歲月神偷偷左，

佢係唔係應該由得張紙缺失既部分，發霉、變灰？
一張紙，俾現實環境撕碎，
佢都仲係佢，
佢有能力可以癒合別人同自己傷口
除非……
佢自己選擇點火。